يا ريس، الدستور بيكتبه 10 أنفار ما تعرفش ولا واحد فيهم، بعد ما كنت بتختار اللي ح يكتب الدستور بنفسك.... دلوقتي 10 مُعينين، بيسلموا ل 50 نفر ولا نعرف واحد منهم، حد يسيب الدستور كده ؟!!
بص العصفورة!
الزرافة و الفيل زعلانين من الإرهابيين اللي في الشارع
ياريس، خارطة الطريق انت اللي اختارتها، و عطيت صوتك بإرادتك الحرة... دلوقتي في خريطة طريق الجنرال كتبها لوحده، و من غير ما يرجعلك...
بص العصفورة
القبض على صحفي الأهرام بتهمة حيازة سلاح
يا ريس،
ده في صاروخ عسكري اتضرب على مدنيين من طيارة هيليكوبتر... مين اللي بيحاسب على المشاريب؟؟
حصار البلطجيه والشرطه والجيش للمحاصرين في مسجد الفتح
بص العصفورة:
مسكوا أحمد عارف!
يا حج... مبارك طلع براءة!!
بص العصفورة:
أخو أوباما طلع إخوان و البرادعي بيقابل التنظيم الدولي مع أشتون
يا ريس،
السيسي بيدي تقرير بقاله "شهور" بحسب تصريح ليه للواشنطن بوست، للأمريكان، و بياخد منهم دعم و مشورة من ورا الرئيس المنتخب... ده بيخون البلد!!
بص العصفورة:
توفيق عكاشة و الجنرال ... الرجلان مفجري ثورة 30 يونيو
يا عم الحج،
المركز المصري لحقوق الإنسان اللي بيراقب على عمل الحكومة اللي كان بيختاره مجلس الشورى حاليا بقى شوية موظفين عند السيسي، بغض النظر عن إن الناس اللي بيعينهم شكلهم نضيف و مستحميين... بس دول كلهم موظفين.
بص العصفورة:
قبضوا على خيرت الشاطر وهو بالملابس الداخلية، و بديع بالقفطان
يا سيدنا، ده مجلس الأمن الوطني اللي بيتشكل من رئيس منتخب، و رئيس شعب، و رئيس شورى منتخب، و رئيس لجنة الأمن في مجلس الشعب و زيه في الشورى، و رئيس الحكومة المنتخب انتخاب غير مباشر، و كام وزير من حكومته مع وزير الدفاع و مدير المخابرات... يعني كل دول منتخبين... بيمثلوك انت شخصيا... تم استبدالهم بمجلس اللي بيقعدوا فيه بيجوا بدعوة شخصية من السيسي... زي المتحدث الرسمي أو نائب الرئيس للعلاقات الخارجية... يعني بيقعدوا يشربوا شاي و يقولوا عليها "مجلس أمن وطني"
بص العصفورة:
مصر تحارب الإرهاب!
يا عمل الحج، يا ريس، يا سيدنا،
أراضي الدولة بقت تتملك للأجانب... فاهم؟؟ يعني فعلا بيبيعوا الأراضي وبيسرقوك. بلاش الأراضي، صرف 4 مليار دولار في اول شهر... انت فاهم؟ ما نعرفش بعزق كام لحد دلوقت... طب بلاش، اخد كام مليار دعم من دول، ما ظهروش في حسابات الدولة ليه؟؟ راحوا فين.. طب انسى، اكبر اقتراض لحكومة... الفلوس دي بتروح فين؟؟ انت بتتسرق... مش حاسس ان اسعار الأكل زادت طيب؟ ما سألتش ليه ؟؟؟
بص العصفورة:
مبادرة من محافظ اسكندرية كل "طن" زبالة ب 30 جنيه!
يا بونا، يا أخي
انت نسيت ان بقا في 17 محافظ عسكر؟ الدولة بقت عسكرية تاني؟ طب بلاش دي، تعرف إن ميزانية الجيش تساوي تقريبا ميزانية الداخلية؟؟ يعني خطر اسرائيل يساوي خطرك انت شخصيا على الدولة؟!! آه وربنا...
أحمد عبدالحميد
ليست هناك تعليقات:
إرسال تعليق